Pas largimit të Roy Hodgson, drejtuesit e Crystal Palace duket se kanë vendosur t’ia besojnë pankinën francezit Patrick Vieira, i cili ka mbërritur në Londër dhe po kërkon shtëpi pikërisht në lagjen që është bazë e klubit.

Drejtuesit e Crystal Palace kontaktuan fillimisht me Lucien Favre, i cili pranoi ofertën, por më pas ndërroi mendje në mënyrë të befasishme, duke thënë se dëshiron të qëndrojë pushim edhe për një sezon tjetër.

Të ndodhur në këtë situatë, londinezët kontaktuan menjëherë me Vieira, një trajner që e njeh mirë Premier Leaguen, pasi ka qenë për shumë kohë futbollist dhe kapiten i Arsenalit.

Eksperienca e Vieira si trajner nisi më 2018-ën, kur u ul në pankinën e Nice-s dhe qëndroi për më shumë se dy sezone, pasi u shkarkua vetëm në dhjetor të vitit të kaluar, pas 5 humbjeve radhazi në kampionatin francez.

Marrëveshja mes Crystal Palace dhe Vieira është arritur dhe në orët e ardhshme pritet të firmoset kontrata e të bëhet prezantimi zyrtar, ndërsa mediat britanike raportojnë se francezi po merret edhe me dokumentacionin për sigurimin e lejes së punës./Supersport/