Teutë dinjitoze në Andorra.

Skuadra durrsake shmangu turpin duke bërë një përmbysje të madhe në ndeshjen e kthimit ndaj Inter Escaldes ndeshje në të cilën ja doli të fitonte me rezultatin 3-0 pas kohës shtesë duke prerë biletën për në raundin e 3-të të Conference League aty ku do të përballet me irlandezët e Shamrock Rovers.

Eksperienca e Sebino Plakut dhe klasi i Sherif Kallakut bënë që skuadra e Edi Martinit të avanconte më tej duke zhvlerësuar disfatën 0-2 të pësuar në Niko Dovana.

Ndryshimet që bëri trajneri Edi Martini në formacion në këtë sfidë sollën frytet e tyre pasi goli i parë që rindezi shpresat e djemëve të detit erdhi pas një harkimi të ulët të Blerim Kotobellit që u devijua në rrjetë nga Plaku.

Ishte pikërisht veterani 36-vjeçar që bëri me krahë Teutën në minutën e 80-të duke nxjerrë nga repertori i tij një gol spektakolar me një goditje fantastike nga distanca që e çoi ndeshjen në shtesë.

Pikërisht në 15 minutat e para të shtesës Teuta shfaqi më shumë dëshirë dhe në fundin e saj fitoi një 11-metërsh me zëvendësuesin Ildi Gruda, penallti të cilën e kthehu në gol Kallaku, finalizim që i çoi shifrat në 0-3 dhe kualifikoi Teutën për më tej.

Një kualifikim i merituar për atë çfarë tregoi në fushë skuadra e Edi Martinit në këtë takim të dytë ndaj modestëve nga Andorra Inter Escaldes.