Nga Bashkim Tufa

“Tokyo Aquatics Centre” tani i ka mbyllur dyert. Noti i ka përfunduar zyrtarisht garat e olimpiadës “Tokio 2020”. U shpërndanë 208 medalje, 124 notarëve ishin më fatlumët.

Mbi të gjithë, ishte ajo që shkëlqeu, 27-vjeçarja australiane Emma McKeon, e cila fitoi më shumë se të gjithë. Plot shtatë, duke u bërë edhe notarja e parë femër në histori, që ka arritur të fitojë kaq shumë medalje në një olimpiadë.

Ajo ishte edhe ‘fenomeni’ i Olimpiadës japoneze. McKeon mori 4 medalje ari, dy të arta ekipore (4×100 m. stil i lire dhe 4×100 m. stil i përzier) dhe dy të arta të tjera në garat individuale 50 dhe 100 metra stil i lirë.

Notarja australiane fitoi edhe 3 medalje të bronzta, dy në ekipore (4×100 m. stil i përzier dhe 4×200 m. stil i përzier), si dhe dhe një medalje bronzi në garën e 100 metrave flutur.

Emma McKeon, e lindur më 24 maj 1994, është një pinjolle e një familjeje notarësh në Australi: xhaxhai, babai, nëna dhe vëllai, të gjithë kanë qenë notarë. Madje babai Ron dhe vëllai David, kanë qenë edhe olimpistë. Madje sërish, Emma u kualifikua për Lojërat e Komonuelthit më 2014 në të njëjtin pishinë në Brisbane, në të cilën nëna e saj, Susie dhe xhaxhai i saj, u kualifikuan për Lojërat e Commonwealth 1982.

Në Lojërat Olimpike “Rio 2016”, Emma dhe vëllai i saj David, ishin pjesë ekipit australian të notit. Në këto lojëra, ajo mori pjesë në garën e stafetës 4×100 metra stil i lire, ku fitoi një medalje të artë me një kohë rekord botëror prej 3:30.65. Përpos kësaj, ajo ka fituar edhe një medalje argjendi dhe dy bronzi në olimpiadën braziliane.

“Përbindëshja” e pishinës së “Tokyo 2020”, australiania Emma McKeon, me pesë medaljet e arta olimpike të fituara deri tani në karrierën e saj, ka arritur një rekord, të cilin e ndan me legjendën e notit botëror, bashkatdhetarin e saj, Ian Thorpe.