Ndonëse prej ditësh stërviteshin nën urdhrat e trajnerit Blendi Shkëmbi, klubi i Dinamos vetëm sot ka zyrtarizuar firmën me dy futbollistë të tjerë që do të veshin fanellën e ‘nëndetëses blu” gjatë sezonit të ri në Kategorinë Superiore.

Bëhet fjalë për mesfushorin Lancinet Sidibe dhe sulmuesin Stephen Chinedu, të cilët jo vetëm stërviten prej ditësh me dinamovitët, por kanë luajtur edhe në miqësoret e klubit gjatë përgatitjeve verore.

Sidibe është një njohje e vjetër për kampionatin shqiptar, pasi ka veshur fanellat e klubeve si Flamurtari e Tirana, ndërsa sezonin e kaluar ishte pjesë e qipriotëve të Ermis dhe tani rikthehet sërish në Superiore, këtë herë me fanellën e Dinamos.

Nga ana tjetër Chinedu është një sulmues 21-vjeçar nga Nigeria, që ka qenë pjesë e skuadrës së dytë të Hajdukut të Splitit dhe tani do të luajë shanset e tij te Dinamo, ku do të provojë të bëjë liderin e repartit të avancuar.