Eksperienca e Dushan Vlahoviç te Juventusi ka lënë shumë për të dëshiruar. I afruar si një “makineri golash” nga bardhezinjtë, lojtari serb është shfaqur rrallëherë si i tillë, ndonëse bëri një start premtues në janarin e kaluar.

Por për të kanë nisur të shfaqin interes skuadra të njohura ndaj edhe Juventusi po e mendon seriozisht shitjen e tij. Sipas të përditshmes italiane “La Repubblica”, Arsenali është emri kryesor që është gati të kthehet përsëri në kërkim të lojtarit i cili i tha “jo” vitin e kaluar pasi zgjodhi bardhezinjtë.

Ndiq "Tifozet.al" në Facebook

Por fakti që tashmë ”topçinjtë” janë në kryesimin e kampionatit anglez mund ta bëjë të ndryshojë mendje. Edhe Bajern Mynih e sheh me shumë interes lojtarin, pasi kërkon një zëvendësues të Levandovskit, me Kejn si prioritet e më pas serbin në vendin e dytë.

Juventusi nuk e cilëson më si të paprekshëm lojtarin dhe me ofertën e duhur, është gati ta lërë të largohet. Të njëjtat burime saktësojnë se klubi bardhezi vlerëson 110 milionë euro kartonin e futbollistit që bleu për 80 milionë euro nga Fiorentina në janarin e vitit të kaluar.