Rijad Mahrez mori rolin e protagonistit sot duke ndihmuar Mançester Sitin të dilte nga një krizë e vërtetë, në përmbysjen 4-2 ndaj Totenhemit në Premier Ligë. Një përmbysje e cila erdhi e gjitha në pjesën e dytë me sulmuesin algjerian si protagonist.

Skuadra e Antonio Kontes nuk e ndjeu peshën e transfertës dhe bëri një pjesë të parë shumë të mirë, duke e mbyllur në fund me gola te Kulusevskit dhe Emerson Rojal. Situatë e cila bëri që lojtarët e Sitit të shkonin në pushimin e ndeshjes nën vërshëllimat e tifozëve të tyre dhe Guardiolën e shqetësuar për atë që kishte dhënë ekipi në fushë.

Por në pjesën e dytë ishte Mahrez ai i cili udhëhoqi përmbysjen e cila nisi me golin e Alvarez. Më pas ishte algjeriani i cili dha një asist për barazimin 2-2 të Haland vetëm 2 minuta pas golit të parë.

Në minutën e 63-të, ishte vetë algjeriani që tundi rrjetën duke mposhtur Loris në shtyllën e tij dhe në minutën e 90 vulosi takimin me golin e shifrave 4-2 që kthejnë Mançester Sitin në shinat e duhura dhe në vendin e dytë në renditje.