Zvicra bën surprizën e madhe në Euro 2020 duke eliminuar Francën, favoriten kryesore për të fituar trofeun nga kompeticioni në fazën e 1/8-ave.

Në Bukuresht, Kylian Mbappe humbi penalltinë vendimtare që nxorri jashtë Francën pas një tjetër ndeshjeje të çmendur me kohën e rregullt që u mbyll në barazim 3-3 përfshirë edhe 30 minutat e shtesës. U kuptua që në fillim që Franca nuk do ta kishte të thjeshtë përballë helvetëve të Petkovic dhe pas 15 minutash, Zvicra zhbllokoi shifrat me Haris Seferovic.

Me këtë rezultat u mbyll pjesa e parë, ndërkohë që në fillimin e së dytës Zvicra fitoi një 11-metërsh me anë të Zuber që u akordua nga VAR, të cilën Ricardo Rodriguez e humbi me Lloris që bëri një superpritje. Gol i sfumuar dhe gol i pësuar për Zvicrën që e pësoi nga Karim Benzema në minutën e 57-të.

Dy minuta më vonë pas një aksioni model të Francës, Benzema shënoi sërish duke kaluar në epërsi gjelat. Në të 75-ën një supergol nga distanca i Pogba krijoi idenë se Franca arriti çerekfinalet, por Zvicra e Petkovic nuk e kishte thënë ende fjalën e fundit në këtë sfidë dhe në 10 minutat e fundit ashtu siç bëri Kroacia ndaj Spanjës realizoi dy herë me Seferovic dhe Gavranovic duke e çuar ndeshjen në shtesë.

30 minutat e shtesës nuk prodhuan asgje dhe sfida shkoi te penalltitë, aty ku Zvicra i shënoi të gjjtha ndërkohë që Mbappe gaboi penalltinë vendimtare duke nxjerrë jashtë francezët.