Një tjetër brazilian te Vllaznia. Fantazisti Wellington Gustavo, i cili ishte në provë prej ditësh pranë klubit shkodran, ia ka dalë të bindë stafin teknik për cilësitë e tij dhe ka firmosur një kontratë trevjeçare.

Pikërisht afati i gjatë i kontratës konfirmon se klubi beson jo pak në cilësitë e fantazistit 25-vjeçar, i cili në të shkuarën ka luajtur edhe me suedezët e Linkoping, përveçse me disa klube në Brazil.

Wellington Gustavo, i njohur edhe si “Gigante”, do të jetë në dispozicion të shkodranëve që në ndeshjen e të enjtes ndaj Siroki Brijegut, në Bosnjë, pasi stërvitet prej ditësh nën urdhrat e Brdariç dhe gëzon formën e duhur fizike.

Me emra si Latifi, Da Sivla e Wellington, shtohet ndjeshëm cilësia teknike dhe fantazia e skuadrës shkodrane, që këtë sezon do të provojë të fitojë titullin kampion, duke qenë se vitin që lamë pas dështoi vetëm për shkak të golavarazhit./ABC NEWS/