Dinamo nuk di të ndalet në këtë merkato verore. Blutë e kryeqytetas ngjasojnë pak me skuadrën që disa muaj më parë siguroi rikthimin në elitën e futbollit shqiptar pas n♪ntë vitesh, sepse me emrat që ka afruar në ekip, Dinamo e Bledi Shkëmbit e ka hedhur që tani kandidaturën si një nga skuadrat që do të luftojnë për titullin kampion në sezonin e ardhshëm të Kategorisë Superiore.

Afrimi më i fundit i Dinamos është talenti që spikati sezonin e fundit me Apoloninë në Superiore, Romeo Harizaj, me blutë që tashmë kanë blinduar edhe portën. Me një ekspert si Edvan Bakaj dhe me një talent si Harizaj në skuadër, Bledi Shkëmbi mund të qëndrojë i qetë pasi porta do të jetë e garantuar.

Ka qenë vetë klubi kryeqytetas që ka zyrtarizuar afrimin e Harizaj për të cilin ishte folur edhe më herët për transferimin e tij te Dinamo. Blutë kryeqytetas arritën akordin me Apoloninë për ta lënë të lirë 22-vjeçari i cili pavarsisht rrëzimit të fierakëve në Kategorinë e Parë ishte një nga më të mirët për Apoloninë teksa spikati me pritjet e tij të shumta mes shtyllave. Në këtë merkato verore nga Apolonia Dinamo ka afruar edhe Rimal Haxhiun, ndërsa pjesë e bluve janë bërë emra me peshë si Agim Ibraimi, Besir Demiri, Enis Gavazaj, Goran Siljanovski, Aleksander Isaevski, Patrik Bardhi etj.