Shpëtim Duro mbetet me këmbë në tokë.

Pavarsisht suksesit 1-0 në ndeshjen e parë të turit të dytë të Conference League ndaj Universitateas së Craiovës dhe problemeve që kanë patur rivalët në ditët e fundit, në konferencën për shtyp përpara kësaj sfide trajneri i kurbinasve theksoi se Universitatea mbetet favorite për kalimin e turit, edhe pse Laçi do të japë maksimumin në këtë sfidë.

“Është ndeshje e fortë, duke pasur parasysh pretendimet e kundërshtarit. Ka qenë favorite në letër. Në ndeshjen e parë shkoi gjithçka mirë, por na pret betejë e ashpër në Kraiovë, por ne do të bëjmë maksimumin dhe të shohim si do shkojë ndeshja.

Kemi bërë gjashtë javë përgatitje dhe për dy javë kemi bërë tri ndeshje dhe pjesa pozitive është se nuk kemi asnjë dëmtim, skuadra është e plotë.

Skuadra është me moral të mirë pas ndeshjes së parë dhe është hapur oreksi për të bërë mirë ndeshjen e dytë.

Të japim maksimumin, pastaj të shohim si shkon ndeshja”, përfundoi Duro.