Sa fiton Lionel Messi te Paris Saint Germain?

Për të zbuluar shifrat e kontratës astronomike që ka firmosur ylli argjentinas me klubin parizien ka menduar e përditshmja franceze L’Equipe e cila e ka nxjerrë në dritë detaje rreth marrëveshjes që firmosi Messi muajin e kaluar me kryesuesit e kampionatit francez.

110 milionë euro në total për 3 sezone do të përfitojë Lionel Messi me PSG-në gjithmonë nëse respekton deri në fund kontratën 2-vjeçare me opsion rinovimi edhe për një vit të tretë.

Në sezonin e parë Messi do të përfitojë një shifër më të ulët se ajo e dy viteve pasardhëse pra me pak fjalë në këtë edicion futbollistik 6-herë fituesi i Topit të Artë do të arkëtojë 30 milionë euro, shifër që do të rritet në 40 milionë euro në vit në dy sezonet pasardhëse.

Ka dhe një risi shumë interesante në kontratën e Messit me Paris Saint Germain pasi siç e ka zbuluar edhe vetë klubi parizien, 34-vjeçari do të shndërrohet në futbollistin e parë në histori që përveç se parave cash do të paguhet edhe në kriptovaluta.

Nga 30 milionë eurot që do të përfitojë Messi në sezonin e parë në Parc des Princes, 1 milionë euro presidenti Al Khelaiffi do t’i derdhë në PSG Fan Token, është monedha e krijuar nga platforma Socios.com. Ndërkohë nga sa mësohet Messi nuk ka përfituar asnjë bonus në momentin e firmës me Paris Saint Germain.